श्री विठोबाची आरती
युगे अठ्ठावीस विटेवरी उभा | वामांगी रखुमाई दिसे दिव्य शोभा |
पुंडलिकाचे भेटी परब्रम्ह आले गा | चरणी वाहे भीमा उद्धरी जगा || १ ||
जय देव जय देव जय पांडुरंगा || रखुमाईवल्लभा राहीच्या वल्लभा पावे जिवलगा जय देव जय देव || धृ ||
तुळसीमाळा गळा कर ठेवुनी कटी | कांसे पितांबर कस्तुरी लल्लाटी |
देव सुरवर नित्य येती भेटी | गरुड हनुमंत पुढे उभे राहती || जय || २ ||
धन्य वेणुनाद अनुक्षेत्रपाळा | सुवर्णाची कमळे वनमाळा गळा |
राई रखुमाई राणीया सकळा | ओवाळिती राजा विठोबा सावळा || जय || ३ ||
ओवाळू आरत्या कुर्वंड्या येती | चंद्रभागेमाजी सोडुनिया देती |
दिंड्या पताका वैष्णव नाचती | पंढरीचा महिमा वर्णावा किती || जय || ४ ||
आषाढी कार्तिकी भक्तजन येती | चंद्रभागेमध्ये स्नाने जें करिती |
दर्शनहेळामात्रे तया होय मुक्ती | केशवासी नामदेव भावे ओवाळिती ||
जय देव जय देव जय || ५ ||